இரயில் சினேகம்...

உறவு....

இரயிலை உறவாய்
நினைத்து,
கையசைத்து
மகிழும் மழலை,
வளர்ந்ததும்,
உறவை இரயிலாய்
நினைத்து
ஏன் சென்றது
தாயைப் பார்க்க...

முதியோர் இல்லம்...
****************************************************************************** 
இரயில் சினேகம்...

ஏறும் போது
வணக்கம் சொல்லும்.
இறங்கும் போது
மறந்து போகும்.
இரயில் சினேகம்
மட்டுமல்ல
வாழ்க்கையும் அப்படித்தான்....

********************************************************************************
வாழ்க்கை..
இரயில் கிளம்பும் ஓசை,
மனிதர்கள் இருக்கை தேடி
அலையும் ஓசை,
இடையில்,

தண்டவாளத்தின் அருகில்
செடியின் மீது
சலனமின்றி
தேன் குடிக்கும்
வண்ணத்துப்பூச்சி...

இரயிலின் இருக்கையில்
அமர்வது போல் தான்
வாழ்க்கையும்.

பலரும் வருவோம், போவோம்

எதுவும் சிலகாலம்,


அதுவரை,
வண்ணத்துப்பூச்சியின்
வண்ணம் ரசிப்போம்.
அதுசுவைக்கும்
தேன் சுவை
உணர்வோம்....


"வசித்து வாழ்வது அல்ல..
ரசித்து வாழ்வதே வாழ்க்கை..."

விருந்தினர் பக்கம் - 
கவிதைப்பூக்களை
வழங்கியவர்...  பெ.ஜெயராமன்...