பிரபல பதிவர்க்கு கடும் கண்டனம் - நையாண்டி தர்பார் உயர்நிலை செயல் திட்டக்குழு தீர்மானங்கள் விபரம்.

 பதிவர்களுக்கு பதிவெழுத விஷய தட்டுப்பாடு ஏற்ப்பட்டுள்ள,
மிக பரபரப்பான சூழ்நிலையில் நேற்று கூடிய ரோஜாப்பூந்தோட்டம் வலைப்பூவின் நையாண்டி தர்பார் உயர் மட்ட செயல் திட்டக்குழு கீழ்காணும் தீர்மானங்களை நிறைவேற்றி உள்ளது.



                      
சாய்பாபாவின் புட்டபர்த்தி பிரசாந்தி நிலையத்திலிருந்து லாரி, லாரியாக தங்கமும், வெள்ளியும் இடம்மாற்றப்படுவதையும், தமிழக அரசு தலைமைசெயலகத்திலிருந்து ஆவணங்கள் மாற்றப்படுவதையும் இணைத்து எழுதி மக்களை பீதிக்கு உள்ளாக்கும் ஊடகங்களை இந்த உயர்நிலை செயல் திட்டக் குழு வன்மையாக கண்டிக்கும் அதே நேரத்தில், தேவைப்பட்டால் அவதூறு வழக்கு தொடரவும் தயங்க மாட்டோம் என்றும் எச்சரிக்கிறோம்.

2ஜி ஸ்பெக்ட்ரம் முறைகேடு பற்றி விசாரிக்கும் பாராளுமன்ற பொதுக்கணக்கு குழு தலைவராக இருக்கும் பரளி பனோகர் ஜோஷி, எட்டாம் வகுப்பு கணக்கு பாடத்தில் பெயிலானவர் என்ற ஆதாரம் எங்களுக்கு கிடைத்திருப்பதால் அவர் தனது கணக்கு குழு தலைவர் பதவியை ராஜினாமா செய்ய வேண்டும் என்று இந்த தீர்மானத்தின் வாயிலாக கேட்டுக்கொள்கிறோம்.(எங்கள குத்தம் சொன்னா விட்ருவோமா?)

எப்படியும் அடுத்த ஆட்சி எங்களுடையது தான் என்பது தேர்தல் கமிஷன் மூலம் உறுதி படுத்தப்பட்டுள்ளதால், சட்டசபை கொடநாட்டு எஸ்டேட்டுக்கு மாற்றப்பட்டுள்ளது என்பதையும், முதல் அமைச்சரவை கூட்டம் மட்டும் சென்னையில் நடைப்பெறும் என்பதையும் மக்களுக்கு தெரியப்படுத்த இந்த உயர்மட்ட திட்டக்குழு உறுதி பூணுகிறது.
        

முதலில் வருவோர்க்கு முன்னுரிமை என்ற அடிப்படையில், நாடாளுமன்ற கூட்டுக்குழு எனப்படும் ஜே.பி.சி.யிலும் எங்கள் அண்ணன் ஆ.அரசன் அவர்களுக்கு விசாரணைக்குழு தலைவர் பதவியை வழங்க வேண்டுமாறு இந்த தீர்மானத்தின் மூலம் பரிந்துரைக்கிறோம். (இல்லையென்றால் லோக்பால் கமிட்டி மீது சேற்றை வாரி இறைத்தது போல அனைவர் மீதும் புனிதநீர் தெளிக்கப்பட்டு, ஊழல் மோட்சம் அளிக்கப்படும்)  


தன்னுடைய வலைப்பூவை யாரும் காப்பி செய்யாதவாறு தடுத்துள்ள நம்பர் 1 பதிவர் சி.பி.செந்தில் குமாரை இந்த உயர்மட்ட திட்டக்குழு கடுமையாக திட்டுகிறது. ஒரு குடும்பத்தில் வேலையில் இருப்பவர்கள், வேலையில்லாதவர்களுக்கு உதவுவது போல, பதிவெழுத விஷயம் இல்லாதவர்களுக்கு, விஷயம் இருப்பவர்கள் உதவுவது தானே முறை.

ஒண்ணு காபி செய்யப்படுவதை தடுக்கும் டெக்னிக்கை சொல்லிக்கொடுங்கள், இல்லையெனில் காபி செய்ய விடுங்கள், நீங்கள் படித்த சிறந்த கருத்துக்களை உங்களை தொடர்ந்து, நாங்களும் பகிர்கிறோம். டீலா நோ டீலா..
(இங்கே கண்டனம் தெரிவித்து விட்டு, தனி மின்னஞ்சலில் ஹி ஹி ஹி சொல்ல மாட்டோம்..)
                                                

காமன்வெல்த் கமிட்டி கலக்கல் கதாநாயகன் கல்மாடியை செருப்பால் அடித்ததை இந்த உயர்நிலை செயல் திட்டக் குழு வன்மையாக கண்டிக்கிறது. ஊழல் மூலம் கொள்ளை அடிப்பது நாட்டிற்கு நல்லதல்ல என்ற தவறான எண்ணத்தை மக்கள் மனதில் விதைக்கும் இது போன்ற செயலை பார்த்துக்கொண்டு நாங்கள் சும்மா இருக்க மாட்டோம் என்றும் இங்கே குறிப்பிட விரும்புகிறோம்.
      
ஐ.பி.எல்லில் சிக்ஸர் அடிக்கும் போதெல்லாம் சியர்ஸ் கேர்ள்ஸ் உற்சாகப் படுத்துவதை போல,, வாக்கு எண்ணிக்கை நடைபெறும் போது, ஒவ்வொரு ரவுண்டிலும் முன்னிலை அறிவிக்கப்படும் போது, வேட்பாளர்களை உற்சாகப்படுத்தும் விதமாக மகளிர் அணியினர்  நடனமிட
அனுமதி அளிக்க தேர்தல் கமிசனை இந்த தீர்மானத்தின் மூலம் வேண்டி, விரும்பி, கெஞ்சி, கொஞ்சி கேட்டுக்கொள்கிறோம். (எங்களுக்கு கொள்கை தான் முக்கியம் என்பதையும் இங்கே, இந்த நேரத்திலே நீங்கள் புரிந்து கொள்ள வேண்டும்) 

தமிழ்மணத்தில் நெகட்டிவ் ஓட்டு போடுபவர்களுக்கு, உடனடியா சில பல வைரஸ்களை அனுப்பும் வகையில் சாப்ட்வேர் ஒன்றை உருவாக்கி அளிக்குமாறு தொழில்நுட்ப பதிவர் "வலையுலக பில்கேட்ஸ்" சசிக்குமார் அவர்களை இந்த உயர்மட்ட திட்டக்குழு கேட்டுக்கொள்கிறது.
  

டிஸ்கி:
இந்த பதிவிற்கு ஹி..ஹி...ஹி... என பின்னூட்டம் இட தடை விதிக்கப்படுகிறது.

ஐ...!  எங்களுக்கும் விருது கிடைச்சிருக்கு.


"ஓவரா பேசுனது போதுங்கப்பா...பூட்டு போடணும் உங்க வாய்க்கு" விருது வழங்கி கௌரவித்த பிரபல பதிவர் அண்ணன் மகுடி மாவீரன் அவர்களுக்கு மிக்க நன்றி.

என் கர்வம் அழிந்ததடி...

சூரியன் வந்து வெளிச்சம் வீசாத அளவு, அடர்ந்து கிடந்த மனக்காட்டில், ஒற்றை சொல்லெறிதலில் கலவரம் பூக்க வைத்த நிகழ்வு நிகழக்கூடுமென்று கனவிலும் நினைத்ததில்லை அவன். கிரீடம் சுமந்து, கம்பீர வலம் வந்தவன், மகுடம் சரிய மயங்கி கிடக்கிறான்.
  
*அதெல்லாம் முன்பு...
கொஞ்ச நேரம்
நிலவு, நட்சத்திரம்
பார்த்து
பதிலுக்கு கண்சிமிட்டி..
கொஞ்ச நேரம்
கவிதைக்கான வரிகளை
செய்நேர்த்தியுடன் கோர்த்து...
பின் அசந்து தூங்கி
அலாரமடித்ததும்
பதறி எழுந்து.....

*இப்போதெல்லாம்
அலாரம் அடிக்கும் வரை
விழித்திருக்கிறேன்.,
பின்பு சிரமமாய்
புரண்டு...

*எங்கே போயிற்று
என் தூக்கம்
என் நிலவு.

எங்கே போய் தொலைந்தது
என் கவிதைகள்?


*"நீர் தான்
காதல் என்பவரோ"
என் கர்வம் கட்டபொம்மனாய்
கேள்வி கேட்டது.
பின் தூக்கிலிடப்பட்டது.

*எப்படி இது
எனக்குத்தான்
காதலில் உடன்பாடு இல்லையே?

எப்படி
என் மரணம் சம்பவித்தது?

மரணித்த பின் வலிக்கிறதே
இது என்ன?

*கேள்வி கேட்டவள்
கனவுகளோடு
உறங்கிக்கொண்டிருக்க...
பதில் சொல்ல வேண்டிய
நான்
இங்கே சிம்மாசனத்தின் ஓரம்
ஒருக்களித்து
இருக்கிறேனே

இது என்ன நியாயம்?

*சரி...
நாளை வருகிறேன்.

கனவுகளும், களவுகளும்
இல்லாத என் தேசத்தில்
நானே களவாடப்பட்டதை
உறுதி செய்ய...


நடிகர் சூர்யாவை பார்த்து கற்றுக்கொள்ளுங்கள் விக்ரம் அவர்களே...


 "அதிகமாய் சம்பாதிக்கும் ஒருவனுக்கு, ஒரு நிலைக்கு மேல் பணம் என்பது வெறும் கலர் காகிதமே"
நடிகர் விக்ரம் என்றாலே எனக்கு நினைவுக்கு வருவது இந்த வார்த்தைகள் தான், இதுவும் விக்ரம் சொன்ன வார்த்தைகள் தான்.

முந்தைய படம் பிளாப் ஆனாலும், அதில் நஷ்டப்பட்டு வீழ்ந்தவர்களை பற்றி கவலைப்படாமல், அடுத்த படத்தில் நடிப்பதற்கு கிளம்பி, வருடத்திற்கு மூன்று படங்களில் நடித்து கல்லா கட்ட நினைக்கும் நடிகர்களில் மத்தியில், நல்ல படங்களை தெரிவு செய்து, மனத்திருப்திக்காக நடித்து வரும் நடிகர் விக்ரம் பணத்தை குவிக்கும் எண்ணத்திலிருந்து விடுபட்டு, குவித்த பணத்தை நல்ல காரியங்களுக்காக செலவிட முன்வந்திருப்பது மகிழ்ச்சி அளிக்கிறது.

நடிகராகவும், நல்ல மனிதராகவும் தன்னை அடையாளப்படுத்திய இந்த சமுதாயத்திற்கு, நன்றி செலுத்தும் விதமாக, தன்னுடைய இரண்டு விதமான அமைப்பு பற்றிய அறிவிப்பினை செய்துள்ளார் விக்ரம்.
குடிசை வாழ் குழந்தைகளின் கல்வியை உயர்த்த, "கற்க கசடற" என்னும் புதிய அமைப்பினை துவக்க இருப்பதாக நடிகர் விக்ரம் அறிவித்துள்ளார்.

இந்த விஷயத்தில் நடிகர் சூர்யா நடத்தும் அகரம் பவுண்டேசன் அமைப்பினை தன்னுடைய வழிகாட்டலாக எடுத்துக்கொள்ள வேண்டும் என்பது தான் இந்த பதிவின் வேண்டுகோள்.

அகரம் பவுண்டேசன் மூலம் அரசுப்பள்ளிகளில் பயிலும், ஏழை மாணவ மாணவியரின் கல்லூரி படிப்புக்கு கல்வி உதவித்தொகை வழங்கப்படுகிறது.

அடுத்த ஆண்டிற்காக மாணவியர்களை தேர்வு செய்யும் பணி இப்போதே தொடங்கிவிட்டது. இன்னும் பிளஸ் டூ தேர்வு முடிவுகள் வராத சூழலில், அதற்காக காத்திருக்காமல், விண்ணப்பத்திருக்கும் மாணவர்களின் காலாண்டு மற்றும் அரையாண்டு மதிப்பெண்களையும் ஆராய்ந்து, அவர்களின் குடும்பச்சூழலை தொலைப்பேசியில் கேட்டறிந்து,அதன் அடிப்படையில் மாணவர்களை நேர்முகத்திற்காக அழைத்திருக்கிறார்கள்.

அதாவது உதவித்தொகை வழங்குவதற்காக மாணவர்களின் தெரிவு கூட, மிக சரியான வழிமுறைகளில் நடைபெறுகிறது.

இந்த வாரம் முழுவதும் நடைபெறும் நேர்முகம் முடிந்தபின், மீண்டும் ஒரு முறை அவர்களை வரவழைத்து, அவர்களின் தனித்திறமைகளை ஆராய்ந்து, அதற்கேற்ப அவர்களுக்குரிய கல்லூரி படிப்பினை தேர்வு செய்வதற்காக ஆலோசனைகள் வழங்கப்படுகின்றன.

கல்லூரியில் சேரும் போது கல்வி உதவித்தொகை வழங்குகிறார்கள்.

சரி, பணம் தான் கொடுத்தாச்சே என்று விட்டுவிடாமல், கல்லூரி படிப்பின் இடையே கிடைக்கும் விடுமுறை நாள்களில் ஸ்போக்கன் இங்லீஷ், கணிணி பயிற்சி, தனித்திறன் பயிற்சி என தொடர்ந்து அவர்களுடைய வாழ்வில் இணைந்திருக்கிறது அகரம் அமைப்பு.

சென்ற ஆண்டு உதவித்தொகை வழங்கிய மாணவர்களுக்கு இன்னமும் பயிற்சிகளை வழங்கிக்கொண்டிருக்கிறது அகரம்.

அகரம் அமைப்பின் மூலம் உதவி பெற்று, கல்லூரி படிப்பை முடிந்து வரும் ஒரு மாணவன் கட்டாயம் வேலைவாய்ப்புக்கும், வாழ்க்கைக்கும் உரிய அனைத்து விஷயங்களையும் கொண்டிருப்பான் என்பது சர்வநிச்சயம்.

கிட்டத்தட்ட ரமணா படத்தில் வருவது போல, ஒரு சமுதாய புரட்சியை ஏற்படுத்தும், தனக்கான திறமைமிக்க மனிதர்களை உருவாக்கும் பாதையில் நடிகர் சூர்யா போய் கொண்டிருக்கிறார்.
 ஏதோ மாணவர்களுக்கு பணம் கொடுத்தோம், அதை போட்டோ எடுத்து ஆனந்த விகடனில் போட்டோம், வீடியோ எடுத்து விஜய் டிவியில் விளம்பரத்திற்காக காட்டினோம் என்று "படம்" காட்டாமல் தொடர்ச்சியாக, சரியான திட்டமிடலோடு, கல்லூரி படிக்கும் காலம் முழுமையும் மாணவர்களுக்குரிய சிறப்பான பயிற்சியை அளிக்கும் அகரம் அமைப்பு போன்று விக்ரம் அவர்களின் "கற்க கசடற" செயல்பட வேண்டும்.

சரியான திட்டமிடலோடு நடத்த இயலாவிட்டால், விக்ரம் சில நடிகர்களை போல வெறும் விளம்பரத்திற்காகத்தான் சமுகசேவகர் வேடத்தில் "நடிக்க இருக்கிறார்" என்று தான் சொல்ல வேண்டும்.

டிஸ்கி:
விக்ரமின் பச்சைப்புரட்சி என்னும் மரம் நடுவதற்கான அமைப்பை விட, கல்வியளிக்க இருக்கும் "கற்க கசடற" அமைப்பு சிறந்ததாகத்தெரிகிறது.
(ஏற்கனவே மரம் நடுகிறேன் என்று ஏகப்பட்ட "படம்"  மற்றும் "பப்படம்" காட்டிக்கொண்டிருக்கிறார்கள். மரம் நடுவதோடு நிறுத்தி விடுகிறார்கள். அதன் தொடர்ச்சியான கண்காணிப்பை செய்யாமல்)

வித்தியாசமான வேடங்களில் மெனக்கெட்டு மனத்திருப்திக்காக,  நடிக்கும் விக்ரம், ஒரு நகை அடகு கடையின் விளம்பரத்தில், நடித்தது
தவறு தானே என்று நீங்கள் கேட்டால், என் பதில் ஆம் என்பது தான்.

பதிவுலக தாதாவாக துடிக்கும் சாதா பதிவர் - வலைப்பதிவு மேனியா பற்றி அதிரடி ரிப்போர்ட்.


வணக்கம் நேயர்களே, இன்றைய நமது நிகழ்ச்சியில் பதிவுலக தாதாவாக மாறத்துடிக்கும் ஒரு சாதா  என்ன அறிகுறிகளை கொண்டிருக்கக்கூடும் என்பது பற்றிய மருத்துவக் குறிப்புக்களை பார்க்கப்போகிறோம்.

இது வலைப்பதிவு மேனியா - பதிவர்களை தாக்கும் நோய், இதன் அறிகுறிகளை நீங்களும் கடந்து வந்திருக்கக்கூடும், அல்லது இப்போதும் இந்த அறிகுறிகள் உங்களுக்குள் இருக்கக்கூடும்.

எப்போதும் Stats பார்த்துக்கொண்டே இருப்பது.

பின்தொடருபவர்கள்  அதிகரிக்கும் போது, புது சொத்து வாங்கின மாதிரி சந்தோஷப்படுவது.

ஆன்- லைனில் எத்தனை பேர் இருக்கிறார்கள் என ஆராய்வது, தான் மட்டும் தான் என்ற உண்மை தெரிந்தவுடன் விரக்தியாவது.

பிரபல பதிவர்களின் பதிவுகளை ஆராய்ந்து, நம்மள விட கேவலமா எழுதியிருக்கிறான் (கவனிக்க அன் விகுதி) ஆனா இவ்வளவு பேர் வந்து பாக்குறாங்களே என கலங்குவது.

அரசியல் கூட்டமா இருந்தா, பிரியாணி குடுத்து ஆள் தேத்தலாம் இப்ப என்ன பண்றது என மருகுவது.

பின்னூட்டமே இல்லாமல் இருப்பதால், தானே மச்சம் வைத்து, மாறு வேடத்தில் வந்து, வேறு வேறு பெயர்களில் பின்னூட்டமிடுவது.

கம்பியூட்டர் தெரியாதுனு சொல்லி, எஸ்கேப் ஆகுற சொந்தகாரங்ககிட்ட, நீங்க தாங்க சின்ன பில்கேட்ஸ் அப்படினு புளுகி ஃப்ளாக் ஆரம்பிக்க மார்க்கெட்டிங் செய்வது-- அட ஓட்டுப்போட ஆள் கிடைக்குமில்ல.

யாரும் ரிஸ்க் எடுக்க விரும்பாததால், தானே கள்ள ஓட்டு போட களமிறங்குவது. ஆனா பாருங்க இப்பவெல்லாம் திரட்டிகள் ரொம்ப உஷாராயிட்டாங்க.(அப்படினா முன்னாடி கள்ள ஓட்டு போட்டிங்களானு கேட்டா..ஹி ஹி ஹி, நமக்கு தற்பெருமை புடிக்காதுங்க)


புதிய பதிவர்களின் பதிவுகளை தேடிப்போய் நீளநீளமாய் பின்னுட்டுவது, (நம்ம இனமில்ல.)பிரபல பதிவர்களுக்கு ஒற்றை வரியில், ஒற்றை வார்த்தைகளில் பின்னூட்டமிட்டு கடுப்படிப்பது.

நல்ல டெரர் பதிவரா பாத்து, அவர்களுடன் சண்டையிடுவது. அடுத்த கட்டமா பஞ்சாயித்த கூட்டுனா "என்ன கைய புடிச்சு இழுத்தாங்க" ரேஞ்சுக்கு என்ன என்ன என கூத்தடிப்பது.

போட்டி வைப்பது, தொடர் பதிவுக்கு வெத்தல பாக்கு தட்டுடன் தடபுடலா கிளம்பி, நான் பொன்னுரங்கம் வந்திருக்கேன் என பீதிய கிளப்புவது.

பதிவிட விஷயம் கிடைக்காத போது விஜய், விஜயகாந்த்,தங்கபாலு,  இவர்களின் வயிற்றெரிச்சலை கிண்டுவது.

கும்மியடிக்கும் கூட்டத்தாரோடு சேர்ந்து, "நானும் பெரிய ரௌடிதாங்க" வாலண்டிரியா ஜீப் ஏறுவது.

சமயத்தில் கும்மி கூட்டத்தாரின் போதைக்கு ஊறுகாயாக மாறி தவிப்பது.

கொஞ்ச நாள் பதிவு போடாமல் இருந்து விட்டு, தமிழர்களே தமிழர்களே என ஆரம்பித்து, ரொம்ப ஆணீ அதனால.. என இழுவை போடுவது.

சில பதிவர்கள் தங்களுக்குள் கூட்டணி வைத்துக்கொண்டு,ஓட்டுப்போட்டு ஹிட்டடிப்பதாக, பார்லிமெண்டை கலங்கடித்து, லோக்பால் விசாரணையை கோருவது.

ஆன் லைன் ஆனந்த விகடனில் உறுப்பினராகி, எல்லா வகை விகடன் களின் கட்டுரைகளையும் வலைப்பூவில் போட்டுத்தாக்குவது. (யார் கண்ணுக்கும் தெரியாமல் நன்றி: விகடன் குழுமம் என்று போட்டுக்கொள்வது)
வணக்கங்களும், வாழ்த்துக்களும் பின்னே வாக்குகளும் என்று டெம்பிளேட் கமெண்ட் போட்டு, பதிவர்களின் கவனத்தை ஈர்க்க முயற்சி செய்வது. (உனக்கு நான் மொய் வைத்திருக்கிறேன், பதிலுக்கு எனக்கு மொய் வைக்க வேணாமா?)







 
கருணாநிதியின் வியாபார ஆலோசகர் போலவும், கோட நாடு தோட்டத்தின் ஆஸ்தான வித்துவான் போலவும், தலைவர்களுக்கே தெரியாத விஷயங்களை, "எனக்கு எல்லாம் தெரியும்" என்ற ரீதியில், வலைப்பூவில் எழுதுவது.  

வாரத்திற்கு ஒரு நாள் "பிரபல பதிவரின்...." என தொடங்கும் தலைப்பினை வைத்து, பதிவெழுதுவது. (மற்ற நாள்களில் இருக்கவே இருக்கு கட், காபி & பேஸ்ட் டெக்னாலஜி)
   
கூச்சமே இல்லாமல் சுஜாதா விருதுக்கு தங்கள் வலைப்பூ விபரங்களை அனுப்புவது.(தகுதியுடையவர்க்கு அது கிடைக்கும் போது, நடுவர் குழுவை திட்டுவது) இந்த வருட இணையதளத்திற்க்கான விருது பெற்ற யுவகிருஷ்ணா அவர்களுக்கு எம் நெஞ்சார்ந்த நல்வாழ்த்துக்கள்)

நேரமில்லாத போது, தனது பழைய பதிவையை, பில்லா 2011 ரேஞ்சில் ரீமேக் செய்வது (இந்த பதிவு, அந்த வகையைச் சேர்ந்தது தான் யுவர் ஆனார்) இது மாற்றங்களுடன் கூடிய மீள்பதிவு.


"அண்ணல்" ரேஞ்சில், சகட்டுமேனிக்கு சகபதிவர்களை திட்டிவிட்டு, இது யாரையும் குறிப்பிட்டு அல்ல, என்னை நானே கேட்டுக்கொள்வது என பீதியை கிளப்புவது.

விளம்பர இடைவேளைக்கு பிறகு நிகழ்ச்சி தொடரும்.

இந்த பதிவை படித்துவிட்டு, கொதிப்பாகி,  கண்டன தீர்மானம் போட்டு விட்டு ஆட்டோ அனுப்ப தயாராகும் பதிவர்களை எதிர்கொள்ள 108 ஆம்புலன்ஸ்களுடன் நாங்களும் தயார்.
இப்ப சொல்லுங்க நாயக்கரே நீங்க நல்லவரா, கெட்டவரா?

புலியின் வால் பிடித்து ஓர் விளையாட்டு...

வன்மம் சுமந்து திரிந்த நாள்களில், ஒரு பகைமையை வஞ்சம் வைத்து தீர்த்த, முன்நாளின் கதை இங்கே கவிதையாய்.....

*அவன் வார்த்தைகளால்
உண்டான அவமானத்தை
முகம் சுருக்கி
சுட்டிக்காட்டினேன்.
-புரிந்து கொள்ளவில்லை.
 
*மனதிற்குள்சின்னதொரு
கறுப்பு புள்ளி
விழுந்தது.






*பின்
வார்த்தைகள் நீண்டதில்
கறுப்பு விரிவடைந்தது.
 

எனக்கே
தெரியாமல்
யுத்தமுஸ்தீபுகள்
எனக்குள்
நிகழ்ந்தன.

*போர் முரசங்கள்
அதிர்ந்தன.
கண் அசைவுக்கு
வீரர்கள்
குதிரையுடன் காத்திருந்தனர்.


*"போர் என்பது
தவறல்ல.."
என
கீதை உபதேசம்
முடித்த பின்
தயக்
கமின்றி
என் காண்டீபம் உயர்ந்தது.
*உறவு
மறந்து போனது.,
இவன் எதிரி
இவன் எதிரி
என்பது மட்டும்
மனதுள் ஓடியது.

அஸ்திரங்கள்
மழையாய்
பொழிந்தது.
*மயங்கி வீழ்ந்து
பின்
மரணித்துபோனான்.
எதன் பொருட்டு
இந்த போர்
என்பதை
உணர்ந்து கொள்ளாமலே...
 


ரசித்தவைகளும், யோசிக்க வைத்தவைகளும்.

இந்த வார  அரசியல்:
ரஜினியின் துணிச்சலும், அரசியலும்.

ஊருக்குள் சுனாமி வெள்ளம் புகுவது போல, நிருபர்கள், ரசிகர்கள் புடைசூழ, ஸ்டெல்லா மேரீஸ் கல்லூரி வாக்கு சாவடிக்குள், ரஜினி நுழைந்த வீடியோ காட்சியை காண நேர்ந்தது. 


வாக்களிக்கும் போது வாக்காளர் எந்த சின்னத்தில் வாக்களிக்கிறார் என்பது ரகசியமாய் பாதுகாக்க வேண்டிய விஷயம், ஆனால் ரஜினி வாக்களிக்கும்போது, எதற்கு அத்தனை பேர் சுற்றி நின்றுக்கொண்டிருக்க, அந்த வாக்குச்சாவடி அதிகாரிகள் எப்படி அனுமதித்தார்கள் என்று தெரியவில்லை.

இரட்டை இலைக்கு ரஜினி வாக்களித்ததாக, ஊடகங்கள் பகிரங்கமாய் தெரிவித்துள்ளனர். (ரஜினி ஒரு ஓட்டு போட்டா, நூறு ஓட்டு போட்ட மாதிரி-னு தேர்தல் ஆணையம் கணக்கில் எடுத்துக்கொள்ளுமா?)

ரஜினி மட்டுமல்ல, மற்ற திரை நட்சத்திரங்களும் கூட அதிமுகவுக்கே வாக்களித்திருப்பார்கள் என்றே  தெரிகிறது.
பாசத்தலைவன் மீண்டும் வந்தால், பாராட்டு விழாக்களில் கலந்துக்கொள்ள வேண்டும் என்பதும் அதற்க்கான முக்கிய காரணம்.

காலையில் இரட்டை இலைக்கு வாக்களித்துவிட்டு, மாலையில் கருணாநிதியுடன் பொன்னர் சங்கர் படம் பார்த்த ரஜினியின் துணிச்சலை பாராட்டியே ஆகவேண்டும். (?????)
இது தான் ரஜினியின் அரசியல் திறமையை காட்டுகிறது. (இப்படியே இருந்தா, அரசியல்ல பெருசா ஒரு ரவுண்ட் வருவீங்க...)
      

இந்த வார கருத்து :

வாரிசு அரசியல் என்பது வேறு. குடும்ப அரசியல் என்பது வேறு.
தன் மகனையோ, மகளையோ அரசியலில் நுழைப்பது வாரிசு அரசியல், தன் குடும்பத்தினர் அனைவரையும அரசியலில் திணிப்பது குடும்ப அரசியல்.

தன்னுடைய மகள் இந்திரா காந்தியை அடுத்து அரசியலுக்கு கொண்டு வந்து குடும்ப அரசியலை ஆரம்பித்து வைத்தவர் நேரு. தன்னுடைய குடும்ப உறுப்பினர்கள் அனைவரையும் பதவிக்கு வர வைத்து, குடும்ப அரசியலை இந்தியாவுக்கே அறிமுகப்படுத்தியவர் கருணாநிதி.
- தமிழருவி மணியன்.

இந்த வார ஜோக்ஸ்:

"எப்படிங்க உங்க கார் ஆக்சிடெண்ட ஆச்சு"
"அதோ அங்கே ஒரு மரம் தெரியுதா"
"ஆமா,, தெரியுது"
"அது நேத்து ராத்திரி எனக்கு தெரியலை"

டாக்டர் : "இந்த ஆஸ்பத்திரிக்கு நான் தான் தலைவர்!"
அரசியல்வாதி: "நான் கூடத்தான் எங்க கட்சியில் டாக்டர்!!"

இந்த வாரம் ரசித்த  கவிதைகள்:

மற்ற எல்லாத்துளியும்
மண்ணில் விழுந்து கரைந்து விட...
உன் மேல் விழுந்த
மழைத்துளி மட்டும்
கவிதையானது.
(நீ வசிக்கும் தெரு - செஞ்சேரி குணசேகரன்)

தர்மாஸ்பத்திரியில்
இலவச மாத்திரை கொடுத்தும்
நோய் முற்றி இறக்கிறார்கள்.
பிரச்சனை மாத்திரை அல்ல...
சாப்பாட்டுக்குப் பின்
போட வேண்டும் என்பதே...
(தகப்பன் சாமி - சுமதிஸ்ரீ)

இந்த வார செய்தி :

இந்த தேர்தலில் 24591 பேர், 49 ஓ-வின் படி வாக்களித்திருக்கிறார்கள். உண்மையில் இந்த எண்ணிக்கை இன்னும் அதிகரித்திருக்க கூடும்.

பல வாக்குச்சாவடிகளில் கட்சிகளின் ஏஜெண்டுகள், ஏன் ஒரு ஓட்டை வேஸ்டாக்குகிறீர்கள்" என்று கிண்டலடித்திருக்கிறார்கள், "ஓட்டு போடலை" அப்படினு சொல்றதுக்கு இங்க வரணுமா என்று தேர்தல் அலுவலர்களும் சொல்லியிருக்கிறார்கள்.

"யாருக்கும் வாக்களிக்க விருப்பமில்லை" என்று வாக்குச்சாவடி அதிகாரி வைத்திருக்கும் 17-ஏ பதிவேட்டில் கையெழுத்து இட்டால் மட்டுமே போதுமானது என்பது பல வாக்குச்சாவடி அலுவலர்களுக்கே தெரியவில்லை. 49 ஓ-வுக்கான படிவம் இல்லை என்று வாக்காளரை மனது மாற்றியிருக்கிறார்கள். 

49 ஓ-வுக்கு விழுந்த ஓட்டுக்கள் என்பது அரசியல் கட்சிகளுக்கான மிக பெரிய அவமானம் என்பதை கட்சிகள் உணராமல், சாதாரணமாகவே எடுத்துக்கொண்டுள்ளன. ஒரு வேளை மின்ணனு இயந்திரத்தில் 49 ஓ-வுக்கென தனி பட்டன் வைக்கப்பட்டிருந்தால், அதிக வாக்குகள் அதற்கே விழுந்திருக்கும். இப்போது அரசியல் யாவாரம் பார்த்துக்கொண்டிருக்கும் பலரும் வேறு தொழிலை பார்க்க போக வேண்டிருந்திருக்கும்.

யோசிக்க வைத்த வலைப்பதிவு:
              

ஜப்பானிய நிலநடுக்கம் மற்றும் சுனாமியிலிருந்து நாம் கற்றுக்
கொள்ள வேண்டிய 10 படிப்பினைகள் பற்றிய ஆஹா பக்கங்கள்


உதிரிப்பூக்கள் :

ரத்தவெறி ராஜபக்ஷ 2011 ஆம் ஆண்டின் உலகின் செல்வாக்கு மிக்க நபர்களுள் ஆறாவது இடத்தில் டைம்ஸ் பத்திரிக்கையால் தெரிவு செய்யப்பட்டுள்ளார். (டைம்ஸ் இப்போது காமெடி டைம்ஸ்)
இணையம் வைத்திருக்கும் அத்துணை சிங்களவர்கள் வாக்களித்தால் கூட அவ்வளவு ஓட்டுக்கள் பெற முடியாத நிலையில் முடிவுகள் இருப்பதால், ரொம்ப கடுப்பா இருக்குங்க எசமான்)  காங்கிரஸ் தலைவர் சோனியா காந்தி இந்தத் தெரிவில் பெற்றிருப்பது 95வது இடம்.

தேர்தல் முடிவுற்ற நிலையில் ஏன் ஆ.ராசா சிறையிலிருந்து ஜாமீனில் வெளியே வர முயற்சிக்க வில்லை? திமுக தலைமை மொத்தமாக கைவிட்டு விட்டதா?

15 வருடம் தவமாய் தவமிருந்து பெற்ற மகளை அன்னிய மண்ணில் இழந்த சித்ரா அவர்களுக்கு ஆழ்ந்த அனுதாபங்கள்.

14 வருடங்களுக்கு பின் ஆண் குழந்தையை பெற்றிருக்கும் "செஸ்" விஸ்வநாதன் - அருணா தம்பதியினருக்கு வாழ்த்துக்கள் ( பத்திரமா பாத்துக்கோங்க)

தேர்தல் பிரச்சாரத்தின் போது விஜயகாந்துக்கு தொண்டை கட்டியிருந்ததே இப்ப நல்லாயிருச்சா? (சீக்கிரம் வந்து, பரபரப்பா பேசுங்க தலைவா..)












வாக்கு எண்ணிக்கையை ஒரு மாதம் தள்ளி வைத்து, அரசியல்வாதிகளின் வயிற்றில் தேர்தல் கமிஷன் புளியை  கரைத்தது போதாது என்று, தேர்தலில் மக்களும் பொங்கி வந்து வாக்களித்து விட, ஆளுக்கொரு விளக்கம் சொல்லி , பீதியாகி கிடக்கிறார்கள் நம்மூரு அரசியல்வாதிகள் (இதுல பெரிய தலைகள் கூட தோற்க போகிறார்கள் என கிளம்பியிருக்கிறது புதிய பீதி) 


கார்டூன் கார்னர்:
மச்சி, ஐ.பி.எல்.லுக்கு அடுத்த ஜே போடலாமா?

வக்கனையாய் அரசியல் பேசினால் மட்டும் போதுமா?




கலைஞராக இருந்தாலும் சரி, ஜெயலலிதாவாக இருந்தாலும் சரி இன்று ஊர் ஊராக பயணப்பட்டு பிரச்சாரம் என்று சளைக்காமல் பேசிக்கொண்டு இருப்பதெல்லாம் வாக்களார்களை கவருவதற்காக தானே...(கதாநாயகன்களும், கதாநாயகிகளும் அதற்காகத்தானே தேர்தல் அறிக்கை என்ற பெயரில் அவிழ்த்து விடப்பட்டார்கள்)


அவர்கள் மட்டுமல்லாது, அனைத்து அரசியல்வாதிகளும்(சரிங்கப்பா, அரசியல்வியாதிகளும்) இப்போது மக்களை நோக்கி, ஆரவாரமாய் வந்து கொண்டிருக்கிறார்கள்.


எல்லாம் மக்கள் போடும் மதிப்பெண்களுக்காக.


அவர்களின் இந்த நேர பேச்சுக்களை மட்டும் பார்த்து ஏமாந்து விடாமல்,  கடந்த ஐந்து ஆண்டுகளில் அவர்கள், அவர்களின் கட்சியின்  செயல்பாடு எப்படி இருந்தது என்பதை கவனத்தில் கொண்டு வாக்களிப்பது தான் சரியான விஷயமாக இருக்கும்.  

யோசித்து வாக்களிக்க வேண்டும் என்பது இந்த பதிவின் கோரிக்கை...


யோசித்தால் வாக்களிக்க முடியாதே என்று நீங்கள் சொன்னால் அது விதண்டாவாதமாகவே இருக்கும். 


அரசியல் என்பது ஒரு சாக்கடை என்று சொல்லி, அரசியல்வாதிகளை சளைக்காமல் திட்டும் நமக்கு, அந்த சாக்கடையை இறங்கி சுத்தம்  செய்யும் தைரியமில்லை. குறைந்த பட்சம் வாக்களிக்கும் கடமையையாவது தவறாது செய்யலாமே.


ஒரு நாட்டின் பிரஜையாய் வாக்களிக்கும் கடமையை செய்யாதவர்க்கு, 
உரிமைகளை கேட்க என்ன தகுதியிருக்கிறது? 


வாக்களிக்காத ஒருவருக்கு, இந்த அரசியல்வாதிகளே மோசம் என கரித்துக்கொட்ட என்ன உரிமையிருக்கிறது?


இங்கே யாருமே உத்தமனில்லை, எதுவும் சரியில்லை என்றாலும் கூட,  49 ஓ என்பதன் படி குறைந்த பட்சம் வாக்களிக்க விருப்பமில்லை என்றாவது நம் கருத்தை பதிவு செய்ய வேண்டும். (சும்மா வாக்குபதிவு மையத்துக்கு முன்னாடி 49 தடவை "ஓ போடு" அப்படினு கத்தணும் நனைச்சுட்டு வீட்டுல டீவி பாத்துட்டு இருப்பது எப்படி நல்ல குடிமகனுக்கு அடையாளமாகும்?)


49 ஓ படி வாக்களிப்பது மிக சுலபம். வாக்காளருக்குரிய அடையாள ஆவணத்தோடு, வாக்குச்சாவடிக்கு சென்று, அங்குள்ள வாக்குபதிவு அலுவலரிடம் இருக்கும் 17-ஏ என்பதில் வாக்களிக்க விருப்பமில்லை என கையெழுத்திட்டாலே போதும்.


"ரொம்ப வக்கணையாய் வலைப்பூக்களில், தெருவோர டீக்கடை பெஞ்சுக்களில், திண்னைகளில், பேருந்து நிறுத்தங்களில்  அரசியல்வாதிகளை பற்றி  வாய்கிழிய பேசினால். மட்டும் பேசினால் மட்டும் போதாது, வாக்களிக்கவும் வேணும்" இது நம்ம பக்கத்து வீட்டு பெரியவரின் அருளுரை.. (வலைப்பூக்களில் என்பது நாம் சேர்த்துக்கொண்டது..ஹா...ஹா... ரொம்ப படிச்சவங்க தான், தங்களின் ஜனநாயக கடமையிலிருந்து தவறுகிறார்கள்)

ஆதலால் மக்களே வாக்களிப்போம்... நம்ம வேலையை எப்போதும் சரியாக செய்வோம். 


நாட்டிற்காக உழைத்தல் என்பது கார்கில் சென்று துப்பாக்கி சுமப்பது மட்டுமல்ல... நம்முடைய வேலையை சரியாக செய்வது தான். 


டிஸ்கி :


சென்ற தேர்தல்களில் நான் வாக்களித்த கட்சி தோற்றுவிடும்...நம்ம ராசி அப்படி. அதனால் இந்த  முறை யாருக்கு வாக்களித்து தோற்கடிக்கலாம் என்ற யோசனையோடு குழம்பிக்கொண்டு இருக்கிறேன்.. உங்கள் ஆலோசனைகளை அள்ளிவிடுங்களே...   (என்னோட ராசி நல்ல ராசி... அது எப்போதும் உங்கள போல நல்லவங்க ஆசி...)

ரஜினிகாந்த் & தமிழருவிமணியனுக்கு ஒரு பகிரங்க கடிதம்..




தமிழருவி மணியன் அவர்களுக்கு வணக்கம், வளர்க உங்கள் நலம்.


தமிழ்நாட்டில் வெள்ளைவேட்டி கட்டிக்கொண்டு எத்தனையோ பேர் திரிந்தாலும், அந்த வெண்மையை உடுத்தக்கூடிய அளவு கண்ணியம் உடைய மிகச்சிலரில் நீங்களும் ஒருவர்.


உங்கள் மனதில் வரித்துக்கொண்ட காமராஜரை போல, இன்னமும் மாசு படியாத மனிதராக எங்கள் முன்பு வலம் வருகிறீர்கள்.


ஈழத்தமிழர்களுக்காக மத்திய,மாநில அரசுக்கள் ஒன்றும் செய்யவில்லை என்பதற்காக, நீங்கள் இருந்த காங்கிரஸ் கட்சியை தூக்கி வீசிவிட்டு வந்தீர்கள். கலைஞர் தந்த திட்டக்குழு துணைத்தலைவர் பதவியையும் துறந்தீர்கள்.


இதற்க்கு பின்னர் நீங்கள் சந்தித்த எதிர்ப்புக்களும், வஞ்சமும் ஏராளம் இருக்கும் என்பதை எம்மால் உணர்ந்துக்கொள்ள முடிகிறது. தியாகம் நிறைந்த , தூய்மையான உங்கள் பொது வாழ்க்கை, உங்கள் மனதில் உள்ள காந்தியை நினைவூட்டுகிறது.


அய்யா, இப்போது தேசமெங்கும் ஊழலுக்கு எதிராக நல்லதொரு விழிப்புணர்வு உண்டாகியிருக்கிறது. கடந்த சில நாட்களாக நாடு முழுவதும் ஊழலை ஒழிப்போம் என்று ஒரு பேரலை பரவிவருகிறது. 


தூய்மைக்கு ஆதரவான தேசம் தழுவிய அனலை தாங்க முடியாமல் மத்திய அரசும் ,ஜன்லோக்பால் மசோதா கொண்டுவர ஒப்புதல் தந்து விட்டது. 


ஜன்லோக்பால் என்பது வெறும் ஆரம்பம் மட்டுமே, இதன் எழுச்சியை, தொடர்ச்சியை வழிநடத்த, இப்போது உள்ள சூழலை நீங்கள் கையில் எடுக்கலாமே. 


ஏற்கனவே நீங்கள் செல்லும் பாதை இதுதான் என்பதால், இதனை தொடர்தல் ஒன்றும் புதியதாய் இருக்காது என்பது 


தமிழ்நாட்டின் அன்னாஹசாரே-வாக மாற உங்களை அழைக்கிறோம். 
அதற்கான தகுதியும், கண்ணியமும் உங்களிடம் (மட்டும்) இருப்பதாகவே தோன்றுகிறது. உங்களுக்கு நாங்கள்  நிச்சயம் துணை நிற்போம்.


அன்புள்ள ரஜினிகாந்த் அவர்களே...


உங்கள் உழைப்புக்கு, ஒரு துளி வியர்வைக்கு ஒரு பவுன் தங்ககாசு தந்த எங்கள் தமிழ்மண்ணுக்கு மட்டுமில்லாது, ஒட்டு மொத்த இந்தியாவுக்கு சாதகம் செய்ய உங்களுக்கு ஒரு வாய்ப்பு கிடைத்திருக்கிறது.


1996இல் தமிழகத்தை ஆள உங்களுக்கு, தங்க தட்டில் வைத்து தமிழ்நாட்டு மக்கள் தந்த வாய்ப்பை தவற விட்டீர்கள்., அது உங்கள் விருப்பம்.


இன்னமும் இந்த மக்களுக்கு ஏதாவது செய்தே ஆக வேண்டும் என்ற எண்ணம் உங்களுக்கு இருக்கும் என்று நம்புகிறோம்.


கடமையை மீற லஞ்சம் கொடுத்த காலம் மாறி, இப்போது கடமையை செய்வதற்கே லஞ்சம் கொடுக்க வேண்டிய அளவுக்கு, இந்த தேசத்தின் வேர் வரை, வேரடி மண் வரை அசுத்தம் பரவிவிட்டது. 


இது உங்களுக்கான நேரம். வந்து எம் மக்களுக்காக களம் இறங்குங்கள்.


அந்த அளவு நேர்மை என்னிடம் இல்லை, என்றெல்லாம் மனச்சாட்சி பேசாதீர்கள். உங்களின் எளிமை மட்டும் போதும் எங்களுக்கு. 


ஊழலுக்கான போராட்டத்திற்கு கூட, ஒரு வசீகர முகம் தேவைப்படுகிறது. அந்த முகம் உங்களுக்கு இருக்கிறது. 


திரையுலகில் இருப்பவர்கள் சொன்னால் கேட்கும் பழக்கம், எமக்கு தொட்டில் பழக்கமாய் வந்துவிட்டதால் தான் உங்களை அழைக்கிறோம்.


அன்னா ஹசாரேவுக்கு இந்தி திரையுலகம் திரண்டு வந்து ஆதரவு தந்தது போல, நீங்கள் வர தமிழ்திரையுலம் கட்டாயம் முகம் காட்டும். 
தமிழ்திரையுலம் வர, ஊடகங்கள் அடையாளம் காட்ட, தேசம் முழுவதும், ஏன் தேசம் தாண்டியும் இது சாமானியமக்களின் இயக்கமாய் விரியும்.


முன்பு ஒரு முறை நதிநீர் இணைப்பிற்காக குரல் கொடுத்தீர்கள், ஒரு கோடி முதல் ஆளாய் தருவதாய் சொன்னீர்கள், அது போன்று தான் இதுவும். நல்லதொரு சமுதாய பணி.


எதுவும் செய்யாமல் இருந்து வருத்தப்படுவதை விட, சின்னதொரு முயற்சி செய்து, அதற்காக வருத்தப்படுவது மேல். ஆதலால் மீண்டும் ஒரு முறை விரல்களை, கடவுளை நோக்கி காட்டாமல், ஊழலை நோக்கி நீட்டுங்கள். இல்லையென்றால் எம் மக்களை நீங்கள் வெறும் வியாபார பயனுக்காக மட்டுமே கவர்ந்திருப்பதாக சொல்லப்படுவது உண்மையாக தோன்றக்கூடும்.


தொழில், புகழ், பணம், இல்லம், மனைவி, குழந்தைகள், அவர்தம் குழந்தைகள் என எல்லா வகையிலும் நிறைவான வாழ்க்கை வாழும் நீங்கள், எங்கள் எதிர்கால வாழ்க்கைக்கும் கொஞ்சம் ஒளியூட்டலாமே.




இப்படிக்கு, 
இந்த தேசத்தின் தெருவோர மனிதன்.

ராஜபக்சேவை ஜெயிச்ச ரஜினி


முஸ்கி:
ரொம்ப நாட்களாக கபில்தேவ் கப் வாங்கிய கறுப்பு வெள்ளை படத்தையே பார்த்துக்கொண்டுருந்த நமக்கு, கலர் படத்தோடு கப்பை பார்க்க வாய்ப்பு அளித்த தோனியின் படைக்கு பாராட்டுக்கள்.

விளையாட்டை, விளையாட்டாய் தான் எடுத்துக்கணும் அப்படினு என்னதான் அறிவு சொன்னாலும், விளையாட்டை சாதாரணமாக எடுத்துக்கொள்ள மனசு விரும்பவில்லை. அதுவும் இலங்கையை ஜெயித்திருக்கும் இந்த தருணத்தில் மனசு கொஞ்சம் அடங்காமலே சந்தோஷிக்கிறது.

காலம் காலமாய், விளையாட்டில் நமக்கு எதிரி என்று ஆகிவிட்ட ஆஸ்திரேலியா, விளையாட்டு மட்டுமல்ல அனைத்திலும் எதிரி என்று நம் மனதில் திணிக்கப்பட்ட பாகிஸ்தான், ரத்தவெறி ராஜபக்சே இருக்கும் இலங்கை என இந்த முறை, இறுதியாய் இந்தியா ஜெயித்த மூன்று நாடுகளும் கொஞ்சம் விஷேசமானவைதான்.

"ஜெயிச்சது முக்கியமில்ல தம்பி, யார ஜெயிச்சோம்- அதுதான் முக்கியம். பைனலில் பாகிஸ்தானை ஜெயித்திருந்தால் கூட இவ்வளவு பட்டாசு வெடிச்சிருக்க மாட்டாங்க"  அப்படினு ஒருத்தர் சொன்னாரு. அவருக்கு காங்கிரசை வீழ்த்திய சந்தோஷம்.

அது என்னவோ தெரியல, நமக்கு பழிக்கு பழி வாங்குனா அப்படி ஒரு சந்தோஷம், அது சினிமாவாக இருந்தாலும் சரி, விளையாட்டுயாக இருந்தாலும் சரி.

அடிவாங்கிக்கொண்டே இருந்த ரஜினி, திருப்பி அடிக்க ஆரம்பிச்சா ஒரு சந்தோஷம் வருமே அப்படி ஒரு  சந்தோஷம், மலிங்காவிடம் அடி வாங்கிக்கொண்டிருந்த இந்தியா திருப்பி அடிக்க ஆரம்பித்த போது.

சின்னப்பிள்ளைத்தானமாக இருந்த போதும், ஒவ்வொரு அடியும், வில்லன் ராஜபக்சேவை, ஹீரோ ரஜினி அடித்தது போலவே இருந்தது.(அப்படித்தாங்க, மனசு நினைத்தது, வேணும்னா என்ன கொடும சார் அப்படினு சொல்லிக்கோங்கோ)

எப்படியோ காம்பிளியின் கண்ணீருக்கும் சேர்த்து பலி வாங்கியாச்சு...

அப்புறம் சச்சினை பாராட்டினா, அதுக்கு ஒரு கூட்டம், நம்மை திட்ட வருது.

மேட்ச் மட்டுமே பார்த்த ரஜினியும், கஜினியும் வெற்றிக்கு காரணம் அப்படினு சில பேர் சொல்லும் போது, சச்சினை பாராட்டினால் திட்ராங்க சார்...

மேட்ச் கூட பார்க்காமல், அடிக்கொருதரம் ஸ்கோர் மட்டும் பார்த்த என்னை பாராட்டியே குறுஞ்செய்திகளை அனுப்பி இருந்தார்கள் நம்ம நண்பர்கள். இந்தியா ஜெயிச்சா நாம ஜெயிச்ச மாதிரியாம்.

ஒண்ணுமே செய்யாத என்னையே பாராட்டுற மக்களுக்கு 21 வருடமாக இந்திய கிரிக்கெட்டின் அடையாளமாக இருந்த தெண்டுல்கரை பாரட்ட மனசு வரமாட்டேங்குது. ஏன் அப்படினு தெரியலை.

ஜெயிச்ச மைதானத்தில் சச்சினை தோள்களில் சுமந்து, அவரின் சகாக்கள் வலம் வந்தது, ரொம்பவும் சந்தோஷமாக இருந்தது எனக்கு. (உங்களுக்கு ?)

"21 ஆண்டிகளாக இந்தியாவை கிரிக்கெட்டில் சுமந்த சச்சின் தெண்டுல்கரை, கொஞ்ச நேரம் நாங்கள் சுமக்கிறோம்" அப்படினு சொன்ன வீரட் கோஹ்லி தான் நேற்றைய மேன் ஆப் தி பஞ்ச்"

டிஸ்கி :

இந்த வெற்றி நம்மை மிரட்டாமலும் இல்லை, இனி காம்பிரின் நாய் குட்டியை பேட்டி எடுப்பார்கள், தோனி வீட்டு காம்பெண்ட் சுவரை படம் எடுத்து அட்டைப்படத்தில் போடுவார்கள்.

ஜெயிக்கறதுக்கு கொஞ்ச நேரம் முன்னாடியே ஸ்ரீசாந், சிம்பு மாதிரி விரல் வித்தைகள் செய்ய ஆரம்பிச்சுட்டாரு.. (ஈசியா ஜெயிக்க வேண்டிய மேட்சை, திரிலிங்கா ஜெயிக்க வைச்சதுக்கு இந்த தம்பிக்குத்தான் நன்றி சொல்ல வேணும்... ஐயோடா)

சரி விடுங்க, ஒரு வேள இலங்கை ஜெயித்திருந்தா எவ்வளவு கொடுமைகளை அதே மைதானத்தில் பார்த்திருக்க வேண்டும், எவனோ ஜெயிச்சு, எவனோ கொண்டாடுறதுக்கு.... நம்ம பசங்க, துள்ளுறது எவ்வளவோ பரவாயில்லை... என்ன சரிதானே?

அண்மைசெய்தி :

ராஜபக்சே திருப்பதியில் மலிங்காவுக்கு மொட்டை அடித்துக்கொண்டிருக்கிறார்.