எல்லா தொகுதிகளிலும் தொடங்கியது பணமழை - மாறும் தேர்தல் முடிவுகள்..

தமிழ்நாட்டில் தொங்கு சட்டமன்றம் அமைய வாய்ப்புள்ளதாக கருத்துக்கணிப்புக்கள் வெளிவந்துள்ள நிலையில், மக்களின் மனதை இறுதியாய் ஒரு முறை குழப்ப, கட்சிகள் தயாராகி விட்டன.

கிட்டத்தட்ட வாழ்வா சாவா என்ற நிலையில் இரண்டு கூட்டணிகளும் இருப்பதால், வைட்டமின் "ப",  எல்லா தொகுதிகளிலும் முழுவீச்சில் பாயத்தொடங்கிவிட்டது. 


தேர்தல் கமிஷன், பறக்கும் படைகள் மூலம் கெடுபிடிகள் செய்வதால், கோடிகளில் பணப்பரிவர்த்தனை நடைபெறும் பெறும் போது சம்பந்தப்பட்டவரே, ஒருவரை அனுப்பி, ஒரு சில லட்சங்களோடு சென்று , தேர்தல் அலுவலர்களிடம் மாட்டிக்கொண்டு பரபரப்பை ஏற்படுத்துவார். அந்த சைக்கிள் கேப்பில் பல கோடிகள் கைமாறி விடும்.


இது வரை சிக்கியுள்ள பணம், கிட்டத்தட்ட ஐம்பது கோடியை தாண்டி விட்டது. இந்த இரண்டு நாளில் மிக அதிகமான பணம் வெளியே வரும்.


யார் வந்தாலும் நமக்கு நல்லது பண்ண போவது இல்லை, வந்த வரை லாபம் என்று கிடைக்கும் பணத்தை வாங்கிக்கொள்வோம் என்ற மனநிலைக்கு மக்களும் வந்து விட்டது தான் வருத்தம். 


எங்களுக்கு கிடைக்க வேண்டிய பணத்தை தேர்தல் கமிஷன் தடுக்கிறது என்று அவர்கள் மீது கோபம் வேறு. (பணம் வாங்கிகொண்டு வாக்களித்தவர்கள் எப்படி அரசியல்வாதிகள் பணம் வாங்குவதை, ஊழல் செய்வதை குற்றம் சொல்லமுடியும்?) 

இன்று மாலையோடு தலைவர்களின் பிரச்சாரம் ஓய்கிறது, ஆனால் தொண்டர்களின் "வித்தைள்" இனிதான் ஆரம்பிக்க உள்ளன.

வழக்கமாய் வீடுவீடாக பூத் சிலிப் வழங்கும் போதுதான், பணப் பட்டுவாடா நடைப்பெறும். இந்த முறை பூத் சிலிப் நாங்களே தருகிறோம் என்று தேர்தல் கமிஷன் என்று சொன்னவுடன் கழகங்கள் அதிர்ச்சியடைந்து விட்டது. ஒரு வழியாக கட்சிகளும் தரலாம் என்று சொன்ன பின் தான் அப்பாடா என்று பெருமூச்சு விட்டனர். 


பூத் சிலிப் தருகிறேன் என்ற பெயரில் இப்போதே வீடு வீடாக பணம் கொடுக்கும் வேலையும் இப்போது தொடங்கிவிட்டது. முதல் கட்டமாக சொந்த கட்சியினருக்கு பணம் கொடுக்க ஆரம்பித்து விட்டனர். 


நாளை இரவுக்குள் வைட்டமின் "ப", எல்லா வீடுகளுக்கும் பாய்ச்சப்படும். இந்த நோட்டுக்கள் எல்லாம், ஓட்டுக்களாக மாறுமா என்பதை பொறுத்தே தேர்தல் முடிவுகள் இருக்கும் என்பது தான் தொண்டர்களின் நம்பிக்கை.

பணத்திற்கு அடுத்த படியாக கட்சிகள் நம்புவது தொலைக்காட்சி வழி பிரச்சாரத்தை தான். 


எந்த தொலைக்காட்சியை பார்த்தாலும், ஒரு சார்பாய் செய்திகளும், விளம்பரங்களும் இடைவெளிவிடாமல் போட்டுத்தாக்குகின்றன.(அளவுக்கு மீறினால் அதுவே எதிராக திரும்பி விடும் என்பதையும் மீறி, வரம்பு கடந்து ஓடிக்கொண்டிருக்கிறது விளம்பரங்கள்)


சன், கலைஞர், ஜெயா தொலைக்காட்சிகள் ஒரு பக்கம், "ஞாபகம் வருதே" என்று மக்களுக்கு துன்பத்தைக் கொடுக்க ஆரம்பித்து விட்டன. 


தொலைக்கட்சி விளம்பரங்கள், பணமழை உச்சக்கட்டத்தை எட்டியிருக்கும் வேளையில் மக்களும் மதி மயங்க ஆரம்பித்து இருக்கிறார்கள். 

பார்க்கலாம், ஜெயிப்பது யார் என்று?