தமிழ்நாட்டை ஆண்டவனாலும் காப்பாற்ற முடியாது!

பணப்புழக்கம் அதிகமாக இருந்த இந்த தேர்தலில் கிட்டத்தட்ட 40 கோடிக்கும் அதிகமான பணமும், தங்க, வெள்ளி நகைளும் கைப்பற்றப்பட்டதாக சொல்லப்படுகிறது.


அட.. வடை போச்சே அப்படினு தான் சொல்லத்தோணுகிறது. இது நமக்கு வர வேண்டிய பணம் என சாமானிய வாக்காளர்களை நினைக்க வைத்ததுதான் தமிழ்நாட்டு அரசியல்வாதிகளின் வெற்றி. வாக்காளர்கள் யோக்கியமாக இருந்தால் தான், ஊழலை தட்டிக்கேட்பார்கள் என்பதால் அரசியல்வாதிகள் அவர்களின் வியாதியை நமக்கும் பரப்புகிறார்கள் போல.(எல்லோரும் தப்பு செய்தவர்கள் என்றால் யார் யாரை கேள்வி கேட்க முடியும்?)

ஒரு கருத்து கணிப்பின் படி கடந்த தேர்தலில், 48 சதவீதம் பேர் பணம் பெற்றுக்கொண்டு வாக்களித்ததாகவும், 31.5 சதவீதம் பேர் பணம் வாங்கிக்கொண்டு தங்களுக்கு விருப்பமான வேட்பாளர்களுக்கு வாக்களித்ததாக ஒப்புதல் அளித்து உள்ளனர்.    


ஓட்டுக்கு பணம் என்பது தமிழ்நாட்டை பொறுத்தவரை இனி நிரந்தரமாகி விடுமோ என்று தோணுகிறது. திருமங்கலம் பார்முலா, இப்போது தமிழ்நாடு பார்முலாவாக மாறிவிட்டது. இனி இது விரைவில் இந்திய பார்முலாவாக மாறிவிடும் போல.

இலவசங்களை தருகிறேன் என்று சொல்லி தமிழ்நாட்டை ஒரு லட்சம் கோடி ரூபாய் அளவுக்கு கடன்கார மாநிலமாக மாற்றிவிட்டார்கள் என்று கருணாநிதியை குற்றம் சாட்டுகிறார்கள். குற்றச்சாட்டும் நியாயமாகவே தெரிகிறது. ஆனால் இனி யார் ஆட்சிக்கு வந்தாலும் இந்த கடன் தொகை இன்னும் அதிகம் தானே ஆகும்?


கருணாநிதி, ஜெயலலிதா இருவருமே ஒருவருக்கு ஒருவர் போட்டி போட்டுக்கொண்டு இலவசங்களை அறிவித்துள்ளதால், அதை நிறைவேற்ற வேண்டிய அவசியம் இருக்கிறது. எனவே யார் வந்தாலும் கடன் இன்னும் இருமடங்காக போகிறது. இப்படியே போனால் விலைவாசி உயராமல் என்ன செய்யும்?


சமீபத்தில் நடந்த குஜராத்,தேர்தலில், இலவச மின்சாரம், வண்ணத்தொலைக்காட்சி தருவதாக என குஜராத் காங்கிரஸ் அறிவித்தது, ஆனால் குஜராத் மக்கள் காங்கிரசுக்கு வாக்களிக்க வில்லை. 


பீஹார் தேர்தலில், லாலு ஏராளமான கவர்ச்சித்திட்டங்களை அறிவித்தார். ஆனால் லாலு தோற்கடிக்கப்பட்டார். 


குஜராத், பிஹார் மக்கள் இலவசங்களை எதிர்பார்த்து வாக்களிக்காமல், வளர்ச்சிக்கு வாக்களித்தார்கள். அந்த மக்கள் தன்மானம் மிக்கவர்கள், அவர்கள் இலவசங்களை வாங்கும் பிச்சைக்காரர்களாக மாறவில்லை என ஒரு பத்திரிக்கை கட்டுரையில் படித்தேன். அப்படியெனில் தமிழ்நாட்டு மக்கள் தான் இலவசங்களை நம்பும் ஏமாளிகளா?


குஜராத் என்றாலே நமக்கு மோடியின் முகம் தான் ஞாபகம் வந்து எரிச்சலூட்டுகிறது, உண்மையிலே குஜராத் மாநிலம் போற்றுதலுக்கு உரியதா? 


டாஸ்மார்க் வருமானம் இல்லாமலே, கடனில் இருந்த குஜராத்தை, ஒரு லட்சம் கோடி உபரி நிதியிலுள்ள மாநிலமாக மாற்ற முடியுமென்றால், தமிழக அரசின் மற்ற வருமானமும், அதிக அளவில் கிடைக்கும் டாஸ்மார்க் வருவாய் முழுவதும் இலவசங்களுக்கு போகிறது என்று தானே அர்த்தம்?


குஜராத், பிஹார் தேர்தலில் இலவசங்கள் தோற்றது எனில் தமிழகத்தில் இலவசங்களை அறிவித்திருக்கும் இருவரில் யார் ஜெயித்தாலும், மக்கள் தோற்றதாகத்தானே அர்த்தம்?


ஓட்டுக்கு பணம், இலவசத்திட்டங்கள் இந்த இரண்டும் இருக்கும் வரை நூறு அண்னா ஹசாரேக்கள் வந்தாலும் ஏன் அந்த ஆண்டவன் வந்தாலும் ஊழலில் இருந்து தமிழ்நாட்டை காப்பற்ற முடியாது.

இதையும் கொஞ்சம் பாருங்க...